Monday 23 February 2015

അമ്പാടിയുടെ ചിത്ര രചനയുടെ കഥ...


അമ്പാടി ചിത്ര രചനയിലാണ്. അലമാരയുടെ വാതിലില്‍ ചോക്ക് കൊണ്ട് വരച്ച ചിത്രങ്ങള്‍ ചൂണ്ടി കാട്ടി അവന്‍ പറഞ്ഞു, "അച്ഛാ നോക്കൂ ഞാന്‍ വരച്ച ചിത്രം"
എത്ര സൂക്ഷിച്ചു നോക്കിയിട്ടും എനിക്ക് ഒന്നും മനസിലായില്ല. "എന്താണിത് അംബാടീ?" ഞാന്‍ ചോദിച്ചു.
"ഇത് കുറച്ച് പക്ഷികള്‍, ഇനിയും ഉണ്ട്, ഇത് ഇടുക്കി ഡാം, ഇത് കാട്, ഇത് ആന, ഇത് മലകള്‍ അങ്ങനെയങ്ങനെ..."
"അച്ഛാ, ഇനി ഞാന്‍ എന്താ വരയ്ക്കേണ്ടത്?" അവന്‍ ചോദിച്ചു.
"മോനേ, നീ ഇനി ഒരു എയര്‍പ്ലെയിന്‍ വരയ്ക്കൂ" ഞാന്‍ പറഞ്ഞു.
"ഓക്കേ അച്ഛാ, പ്ലെയിന്‍ മേഘത്തിന്‍റെ ഇടയില്‍ കൂടി പറക്കുന്നത് വരയ്ക്കാം" അവന്‍ പറഞ്ഞു.
ഏതാനും സെക്കണ്ടുകള്‍ക്കുള്ളില്‍ അവന്‍റെ ചിത്ര രചന തീര്‍ന്നു, "നോക്കൂ അച്ഛാ"
ഞാന്‍ നോക്കി, "ഇതില്‍ എവിടെയാ അമ്പടീ പ്ലെയിന്‍?" ഞാന്‍ ചോദിച്ചു.
"ശ്ശൊ! ഈ അച്ഛന് ഒന്നും അറിയില്ല. അതല്ലേ ഞാന്‍ പറഞ്ഞത് പ്ലെയിന്‍ മേഘത്തിന്‍റെ ഇടയില്‍ കൂടിയാ പറക്കുന്നെ എന്ന്. അപ്പോ പിന്നെ പ്ലെയിന്‍ കാണുന്നതെങ്ങിനെ?"